Makarone sa porilukom

Evo јоš jedan recept koji  šaljem  Milici sa bloga Na tanjiru koja je za ovaj mjesec domaćica igre za blogere Ajme koliko nas je. Tema igre je poriluk koji ja često koristim i već sam joj poslala par recepata a ostalo je još par uslikanih jela koje neću stići da objavim jer je sjutra zadnji dan ovog kruga igrice ali će kad tad doći na red. Ove makarone su veoma često na našem stolu a recept je iz neke stare Praktike ali je u originalu bio sa blitvom a ja sam ga malo preradila i umjesto blitve iskoristila poriluk.

 

 

Potrebno je

 

 

250 gr makarona

250-300 gr poriluka

2 jajeta

1,5 dl mlijeka ili jogurta ili miješano mlijeko i pavlaka

200 gr bijelog sira

malo putera

po zelji nekoliko šnita pančete nasjeckane na kockice

 

 

 

 

Makarone skuvati ali paziti da se ne prekuvaju. Poriluk dobro oprati i sitno nasjeckati pa ga prodinstati na malo ulja da svene i malo omekša.

Makarone procijediti, dodati im izmrvljen sir, mlijeko i pavlaku, jaja i poriluk i sve promiješati. Sipati makarone u podmazan pleh, odozgo staviti malo putera sjeckanog na listiće i zapeći u dobro zagrijanoj rerni da fino porumeni. Služiti sa jogurtom a fino se slaže i sa salatom od paradajza.

Po želji sa porilukom možete propržiti i malo sitno sjeckane pančete. Ona se fantastično slaže sa porilukom ali pošto mi u zadnje vrijeme malo više pazimo na to šta jedemo ja je ovaj put nisam koristila.