Mini pizze

 Mini pizze su idealne za dječije rođendane i proslave ali su veoma praktične i kao brza večera. Dejca im se uvijek obraduju, dekorativne su i mogu se napraviti sa različitim nadjevima. Odlična stvar kod ovih pizza je što se tijesto umijesi dan ili dva ranije i čuva u frižideru. Tako ćete kad ogladnite ili dođete iz šetnje veoma brzo imati ukusnu toplu večeru. Ja sam ih isprobala sa nekoliko različitih nadjeva a vi svakako možete staviti i nešto sasvim drugačije prema vlastitiom ukusu. U osnovi je klasično tijesto za pizzu koje se samo podijeli na više manjih loptica, ostavi malo da naraste, filuje i peče na jakoj temperaturi.

Potrebno je

3 dl mlake vode

20 gr kvasca

so(ravna kašičica)

2 kašike ulja

brašno po potrebi

paradajz(na pr cirio rustica)

bosiljak

origano

bijeli luk u prahu

šunka(ja obično kupim barenu pečenicu veoma tanko narezanu a može i suvi vrat, ćureća prsa, budimska salama, kulen)

gauda ili mozzarella

origano

masline

feferoni

svježi bosiljak

Kvasac rastopiti u mlakoj vodi, dodati ulje i brašno, so i umijesiti mekše tijesto. Ja obično ovo radim uveče pa ostavim tijesto u frižideru preko noći. Dakle kad se tijesto fino umijesi treba ga vratiti u neku vanglu, ušuškati kesom za zamrzivač i pokriti pa ostaviti da prenoći u frižideru.

Sjutradan tijesto podijeliti na 16 dijelova i svaki dio oblikovati u lopticu.Složiti ih u pleh na papir za pečenje i ostaviti jedno 20 min da odstoje pa svaku lopticu pritisnuti čašom da se malo razvuče i da se napravi udubljenje u koje ćete stavljati nadjev. Pizze možete još malo razvući rukama a zatim filovati i peći u rerni zagrijanoj na najjaču temperaturu. Kod mene je to 270C.

Možete ih filovati po želji a evo i nekoliko predloga:

paradajz sos, kulen, sir, masline, feferoni, origano i svježi bosiljak ako ga imate

paradajz sos, budimska salama, sir,origano,

budimska salama, sir

pesto pomiješan sa malo majoneza ili kisele pavlake, sir, suvi vrat

paradajz sos, barena pečenica, sir, origano.

Naravno možete koristiti i neki sasvim drugačiji nadjev po vašem ukusu ali šta god da stavite sigurna sam da ćete imate brzinsku i veoma ukusnu večeru.