Kolašin

Odlazak u Kolašin za nas polako postaje tradicija. Ove godine smo proveli par dana u hotelu Bianca, šetali oko Bigradskog jezera, a uspjeli smo da odemo i na skijalište i uberemo malo divljih malina i jagoda. Od njih sam ja kasnije napravila tortu tati za rođendan a ono što je ostalo sam pomiješala sa borovnicama i napravila sok veoma interesantnog ukusa. Evo i par sličica za vas.

Semifreddo sa plazmom, malinama i bijelom čokoladom

Evo jedan fantastičan ljetnji desert koji sam naravno pronašla na Coolinarici. U originali je pravljen samo sa plazmom i bijelom čokoladom ali sam ja čim sam pročitala recept pomislila da bi se maline tu odlično uklopile i nisam pogriješila. Bez malina je ok ali sa malinama je mnogo više od toga. Svi koji su ga probali su bili oduševljeni i tražili su repete neki i više puta :-).
Po receptu kolač se čuva u zamrzivaču ali ja mislim da bi tako bio previše tvrd i leden tako da ga prije služenja ubacim u zamrzivač 2-3 sata. Tako se maline samo malo zamrznu a fil bude hladan ali ne tvrd. Meni ovakav najvbolje prija. Kolač može da se čuva i samo u frižideru i služi bez zamrzavanja jer nije previše mekan i može da se reže i bez zamrzavanja.

Semifreddo sa plazmom, malinama i bijelom čokoladom

 

4 žumanca
4 kašike šećera
3-4 kesice vanile
200 gr bijele čokolade
150 gr plazma keksa
200 gr malina
500 ml biljne slatke pavlake

1 kesica šlag pjene

Žumanca umutiti sa šećerom i vanilom pa skuvati na pari. U vreo fil dodati bijelu čokoladu, promiješati ga da se čokolada istopi pa ga ostaviti da se ohladi. U hladan fil dodati umućenu slatku pavlaku i podijeliti ga na dva dijela. Plazmu izmrviti oklagijom tako da ostanu krupniji komadi a 4 kašike odvojiti. Ostatak plazme dodati u jednu polovinu fila.

Kalup obložiti kesom za zamrzivač ili providnom folijom, sipati 4 kašike izmrvljene plazme, pola žutog fila, pola malina, pola fila sa plazmom, žuti fil, maline, fil sa plazmom. Ostaviti 2-3 sata u zamrzivaču da se stegne pa prevrnuti na tanjir i ukrasiti umućenim šlagom. Služiti odmah a ostatak čuvati u zamrzivaču ili frižideru po želji.

Pita od višanja

Jeste da je sezona višanja već prošla, ali kako se ova pita pravi od zamrznutih višanja, to nije od nekog značaja. Pored toga ovo je najbolja pita od višanja koju sam ja do sad pravila. Recept sam našla kod Minje i kao i ostalo što sam od nje probala i ovo je odlično. Ja sam koristila malo manje šećera nego što ide po receptu ali su moje višnje prilično slatke. Recept pišem onako kako sam ga ja pravila.

Pita od višanja

 

500 gr tankih kora (za baklavu)

600 gr očišćenih višanja

6 kašika šećera

6 kašika plazme

ulje

Kore podijeliti na 3 dijela. Ako imate 18 kora tj ako su veoma tanke što je i najbolje za ovu pitu dobićete 3 grupe po 6 kora, a ako su vam kore deblje onda stavite po 4 ili 5 kora. Svaku koru premazati uljem a na zadnju sipati po dvije kašike plazme i šećera i ravnomjerno ih rasporediti po kori. Preko šećera i plazme rasporediti višnje po cijeloj površini kore, urolati, složiti na papir za pečenje, premazati uljem i peći na 200 C da fino porumeni.
Pečenu pitu prohladiti, posuti mješavinom prah šećera i vanile i uživati. Meni je najljepša dok je još malo mlaka mada je odlična i kad se skroz ohladi. Za ovu pitu birati što tanje kore koje ne smiju biti žilave.