Lažni tartar sos

Evo i jednog laganog sosa koji ide skoro uz sve a napravi se za 1-2 minuta. Mi ga jedemo sa faširanim šniclama, pohovanim mesom, barenim ili pohovanim  brokolijem, karfiolom, kuvanim kukuruzom, natur šniclama, grilovanim mesom, ma skoro sa svim. Do skoro smo umjesto ovoga jeli majonez ili majonez sa malo sjeckanog peršuna ali kako smo počeli malo da pazimo na ishranu probali smo i ovako i to nam je sad sos br 1. Ja obično koristim onu manje masnu pavlaku  sa 12% mlječne masti tako da ovo dođe baš dijetalna varijanta u odnosu na majonez a meni je čak i mnogo ukusnije ovako.

Potrebno je

2 dl kisele pavlake

kašičica senfa

malo bibera

malo sjeckanog peršuna

3 manja kisela krastavčića 

bijeli luk u prahu

može i malo suvog  kopra

Peršun sitno isjeckati, krastavčiće izrendati na sitno, dodati pavlaku, senf, biber, bijeli luk u prahu i sve dobro promiješati. Ostaviti jedno 30 min -1 h u frižideru da se malo ohladi i spreman je za upotrebu.

Slaže se skoro sa svim. Ja sam na primer juče pohovala tikvice, obarila brokoli, pržila šnicle na gril tiganju i kuvala mladi kukuruz i sve se to odlično slaže sa ovim sosom. Danas su za ručak faširane šnicle a pošto nisam našla svježi brokoli i karfiol kupila sam onaj zamrznuti koji onako pravo iz zamrzivača  samo umočim u brašno i jaje i pržim.

Prošle godine kad smo bili na ljetovanju kupili smo u prodavnici tartar sos. Neću sad pominjati ko je bio proizvođač ali niko nije htio da ga jede tako da seja dugo nisam usuđivala da probam da napravim nešto slično ali ovaj  sos se uvijek  pojede samo uz jedan ručak tj ništa ne osatne. Da napomenem još da moj dragi dodaje u sos još i ljutu drobljenu papriku pa ko voli može i to da isproba.

Gulaš

Ovo je moj pokušaj da dostignem savršenstvo tj ukus gulaša iz konzerve. U prodavnici obično bježim što dalje od mesnih konzervi, nekako nemam želju ni da ih kupujem ni da ih jedem kad pomislim šta sve u njih stavljaju i na šta vjerovatno njihova proizvodnja.Prije neku godinu sam upoznala i jednog veterinara koji je imao praksu u fabrikama za preradu mesa  i rekao nam je da ko to vidi više nema želju da jede njihove proizvode. Za razliku od mene dragi obožava gulaš iz konzerve pa sam ja eksperimentisala i dodavala razne začine sve dok nisam dobila pozitivnu ocjenu.

Potrebno je

500 gr mesa(može se koristiti svinjetina na pr od vrata ili teleći ribić)

1 velika glavica crvenog luka

2 lista lovora

ravna kašičica slatke mljevene paprike

biber

začin

čen bijelog luka

malo sjeckanog peršuna

prstohvat origana

1-2 dl paradajza soka, pasate ili smrvljenog pelata

Na malo ulja popržiti sjeckani luk, da postane  staklast, dodati bijeli luk i meso i pržiti još malo da se i meso isprži sa svih strana. Dodati začine, paradajz naliti sa malo vode pa kuvati dok meso omekša. Ja gulaš kuvam u ekspres loncu jedno 30-40min u zavisnosti od toga kakav je lonac.

Kada je meso skuvano prokuvati ga još malo da tečnost malo ispari a onda zgusnuti sos zaprškom od malo brašna i vode. Posuti sjeckanim pešunom.

Služiti uz pire krompir ili bareni pirinač.

Sok od malina

Evo od mene i jedan sokić. Slike baš nisu neke mada sam se trudila koliko sam mogla ali šta je tu je nije fotogeničan ali je fenomenalan, domaći pa još od malina. Sezona malina je pri kraju na moju veliku žalost i ovo je moj pokusaj da još neko vrijeme uživam u njihovoj predivnoj aromi. 

 Odavno već pravim sok po ovom receptu ali od borovnica. Recept sam inače dobila od kumine mame koja je veoma dobra domaćica a kako sam ja kao klinka stalno visila kod njih pokupila sam od nje mnogo dobrih recepata i savjeta.Prije neku godinu jedan kolega iz Bijelog Polja pomenuo je da njegova žena pravi odličan sok od malina i po opisu sam odmah videjla da je to veoma sličan recept ovom mom tako da sam i ja odmah probala i od tada svake godine napravim po nekoliko flaša u sezoni.

Potrebno je

250 gr malina

600 gr šećera

500 ml vode

1 kesica limontusa 

Da bi napravili ovaj sok potrebna vam je i jedna staklena boca od litra sa širokim grlom. Pošto je moja boca trenutno zauzeta jer je u njoj višnjak ja sam koristila vakum teglu odgovarajuće veličine.

Maline treba oprati i sipati u bocu pa preko njih usuti limuntos. Vodu i šećer prokuvati da proključa i onda vrelim šerbetom naliti maline u boci i zatvoriti. Bocu uviti u stolnjak i ostaviti tako da se potpuno ohladi pa onda čuvati u frižideru. Može se  par puta promućkati da maline bolje puste sok. Prilikom služenja sipati u čašu i dio malina i razblažiti vodom. 

Pizza

Ako šta volim da jedem to je pizza i čini mi se da bih mogla da je jedem svaki dan. Kad sam bila klinka dok još nisam naučila da pravim tijesto za pizzu kad mi se bas prijede pravila sam špagete sa paradajz sosom i sirom da me pođe želja a onda sam vremenom naučila da umijesim tijesto i razradila i par caka da pizza ima onaj ukus i miris kao prava.Što se filova tiče kod mene je najčšće na stolu nešto kao capricciosa tj pizza filovana pečurkama, paradajzom, šunkom i sirom ili diavolo sa kulenom, sirom, pečurkama i feferonima. 

Potrebno je

3 dl mlake vode

20 gr kvasca

so(ravna kašičica)

2 kašike ulja

brašno po potrebi

šunka(ja obično kupim barenu pečenicu veoma tanko narezanu)

šampinjoni

gauda ili mozzarella

origano

paradajz(na pr cirio rustica)

bosiljak

origano

bijeli luk u prahu

masline, svježi bosiljak

Kvasac rastopiti u mlakoj vodi, dodati ulje i brašno, so i umijesiti mekše tijesto. Ja obično ovo radim uveče pa ostavim tijesto u frižideru preko noći a sjutradan kad dođem sa posla imam gotovu pizzu za 15 min. Dakle kad se tijesto fino umijesi treba ga vratiti u neku vanglu, ušuškati kesom za zamrzivač i pokriti pa ostaviti da prenoći u frižideru. Ako se koristi odmah onda tijesto treba ostaviti jedno sat vremena da naraste pa nastaviti sa pravljenjem pizze.

Kada je tijesto naraslo podijeliti ga na dva dijela i svaki dio oblikovati u kuglu.Ostaviti ih jedno 10 min da odstoje pa kuglu staviti na pobrašnjenu površinu i prstima razvijati da se dobije krug veličine veće pizze.

U međuvremenu rernu zagrijati na najjaču temperaturu. Kod mene je to 270C. U rernu ubaciti običan pleh, onaj metalni koji dođe sa šporetom, da se i on dobro ugrije. 

Paradajz pomiješati sa bosiljkom i origanom i bijelim lukom u prahu pa ovim sosom premazati pizzu. Po sosu složiti šunku, narendati sir i šampinjone(njih rendati na onaj dio koji služi za rendanje kupusa kojim se mogu napraviti tanke šnite) i sve posuti sa malo suvog origana. Po želji se može dodati i nekoliko crnih ili zelenih maslina.

Peći na najvišoj poziciji direktno ispod grijača da fino porumeni. Izrezati i uživati. Za dekoraciju se može odozgo staviti i par listića svježeg bosiljka ali ja ovaj put nisam imala vremena za to :-)

Moj riblji ručak

Kod nas se kad je o ribi riječ najviše koristi pastrmka. Nekako mi je ona najukusnija, prilično se jednostavno čisti od koščica tako da mogu dok ja ručam fino da nahranim i ćerkicu. S vremena na vrijeme probamo mi i po neku oradu ili oslica ali pastrmci se uvijek vratimo. Nekad smo mnogo jeli i šarana ali kako se on lovi u jezeru koje je vjerovatno prilično zagađeno nekako me prošla volja da ga jedem. Za pastrmku znam da može da preživi samo u čistoj vodi i onda sam nekako najsigurnije kad nju jedemo. Pored toga mi imamo i djeda ribolovca koji kad ima dobar dan ulovi i po nekoliko kg pastrmke tako da nas sve snabdijeva ribom koju ja onda koristim i za prženje i za čorbicu. Možda se mnogi od vas neće složiti sa idejom da se čorba može napraviti i od pastrmke međutim prva riblja čorba koju sam ja probala tj koju sam pojela bila je napravljena upravo od pastrmke. Prije jedno15 god kad smo se tek upoznali moj mužić je odlučio da pokaže svoje kuvarsko umijeće i napravio je čorbicu koja se meni veoma dopala. Prije toga se ribljoj čorbi nisam primicala ni na puškomet ali da li zbog recepta ili zbog kuvara tek od tad je riblja čorba redovno na našem stolu.

Potrebno je za čorbu

1 pastrmka

 1 kolut celera

lišće celera

1veća ili dvije manje šargarepe

1 glavica crvenog luka

bijeli luk u prahu

peršun

začin

biber

aleva paprika

dimljena mljevena paprika

ljuta tucana paprika

sok od paradajza po ukusu

ravna kašika brašna

Ribu, celer, šargarepu i luk staviti u šerpu i kuvati. Pošto se riba veoma brzo skuva treba je izvaditi poslije jedno 10-15 min i ostavit da se prohladi a povrće kuvati da omekša.

Kada se riba ohladi očistit je od kože i koščica. Supu procijediti pa joj dodati  šargarepu  sjeckanu na kolutove i celer isjeckan na kockice. Luk usitniti štapnim mikserom i takodje vratiti u čorbu.  

 Naliti paradajzom po ukusu, dodati papriku, biber, bijeli luk, začin i vratiti na ploču da proključa. Po potrebi dodati još vode. Kada čorba proključa dodati joj zapršku napravljenu od brašna i malo vode i ostaviti da se još malo kuva da postigne željenu gustinu. Posuti sjeckanim peršunom. Uz čorbu poslužiti i tucanu ljutu papriku tako da svako sam može da zaljuti čorbu po želji. 

Čorbica nam je kao predjelo a glavno jelo je pržena pastrmka sa prilogom od blitve i krompira i grilovano povrće koje se meni fantastično slaže sa  prženim mesom pa tako i sa ribom.

Pržena riba

po jedna pastrmka srednje veličine po osobi

brašno

so

ulje za prženje

Kod nas najbolje prolazi pržena riba tako da je ja najčešće tako spremam. Dakle samo je posolim, uvaljam u brašno i pržim na ulju da fino porumeni. Znam da ovo i nije baš najzdraviji način za pripremanje ribe ali samo tako se dobiju krckavi repići koje moja duša tamani

Uz ribicu obično napravim i prilog od krompira i blitve.

Originalni recept je ovdje a ovo je moja obrada

Krompir sa blitvom

2 veća krompira

250 gr blitve

2 čena bijelog luka

so

maslinovo ulje

Krompir oguliti i nasjeći na krupnije kocke pa kuvati u slanoj vodi.Blitvu oprati, otkinuti peteljke pa je nasjeći na krupnije komade i pred kraj kuvanja je dodati krompiru. 

 Sve još malo prokuvati da i blitva omekša, procijediti, dodati sitno sjeckani bijli luk, vratiti na poloču i kratko promiješati da tečnost koja je preostala uvre a zatim skloniti sa ploče i naliti maslinovim uljem, promiješati , poklopiti i ostaviti jedno 10 min dok se riba prži da se ukusi povežu.  Uz ribu obavezno poslužiti i marinadu od malo bijelog luka, sjeckanog peršuna, ulja i sirćeta.

Grilovano povrće

1 tikvica

10 čeri paradajza

mala glavica crnog luka

2 čena bijelog luka

so

maslinovo ulje

Svo povrće oprati tikvice nasjeći na kolutove, crveni luk takođe, paradajz na polovine a bijeli luk sitno nasjeckati. Svo povrće pomiješati naliti maslinovim uljem pa onda pržiti na gril tiganju dok fino omekša.

Na kraju kad se ovako naradite red je da sjednete i uživate u rezultatima svog rada 

Prijatno :-)