Razvučene priganice ili mekike

Evo još jedan recept za priganice kod mene :-). Kad malo bolje razmislim možda sam blog trebala nazvati priganica ali to mi nije palo na pamet kada sam prije više od sedam godina počela da ga pišem. Na njemu već ima priličan broj recepata za krofne, priganice, mekike i razna druga pržena tjesta ali kako je ovo jedan od recepata koji najčešće koristim red je da se i on nađe ovdje. Ove priganice su zapravo sirotinjska verzija jednog drugog recepta a spremane su prvi put kada smo jedne godine bili na ljetovanju na Žabljaku. Kuća u kojoj smo bili smješteni bila je prilično udaljena od najbliže prodavnice a kako se nisam na vrijeme sjetila da kupim sve što mi treba napravila sam tijesto od onoga što sam imala. Mislim da od tada onaj drugi luksuzniji recept nisam više nikad pravila a ovo su postale omiljene priganice mojoj djeci.

Razvučene priganice

3.5 dl mlijeka

2 jaja

2 kašike šećera

20 gr svježeg kvasca(pola kockice)

1 kašičica soli
brašno po potrebi

Kvasac rastopiti u mlakom mlijeku, dodati mu šećer, jaja, brašno i so. Brašna dodavati toliko da se umijesi tijesto koje se može mijesiti kašikom ili mikserom ali da ne bude previše meko. Umiješeno tijato prebaiti u neku plastičnu činiju sa poklopcem i ostaviti preko noći u frižideru.

Sjutradan kašikom zahvatati loptice tijesta. Vlažnim rukama što tanje razvlačiti tijesto pa ga pržiti u tiganju na malo vrelog ulja. Slagati na salvete da se upije višak masnoće. Služiti tople uz džem , eurokrem, med, pršutu ili neke druge suhomesnate proizvode, sir, kajmak....

Peti rođendan

Kako brzo djeca rastu. Ponekad pomislim da ću se sjutra probuditi a oni će biti već odrasli ljudi i mada se radujem tome što postaju sve samostalniji i ozbiljniji ipak se ponekad sa žaljenjem sjetim onih dana kada su bili mali zvrkovi koji samo uskoče mami u krilo. Vule se ipak ponekad još ugnijezdi kod mene da se izmazimo. On je sad već veliki momak. Prije par dana je napunio cijelih pet godina. Rođendan smo po običaju proslavili kod kuće a ja sam bila zadužena za tortu i posluženje. Ove godine pravila sam reform tortu po Majinom receptu koja nam je jedna od omiljenih torti a pogodna je i za oblaganje fondanom. Torta je bila obložena domaćim fondanom napravljenim po Minjinim receptu a ukrase sam pravila od kupovnog fondana. Slavljenik je tražio tortu sa dinosaurusom ali ja baš i nisam bila zadovoljna kako je torta ispala. Vule joj je ipak dao pozitivnu ocjenu i smazao nekoliko parčadi tako da mislim da je na kraju sve dobro prošlo. Evo i par rođendanskih slika.