Voćni kolač i skijalište Jezerine

Svaki put kad odemo u Kolašin svratimo i na skijalište. Tamo je do ove godine i ljeti bio otvoren neki etno restoran pa smo uvijek isli da se prosetamo, popijemo kaficu i naberemo divljih malina jer oko staze rastu divlje maline koje predivno mirišu. E ovaj kolač na slici je od tih malina samo što su ove godine maline bile već skoro prošle ali je zato bilo i kupina pa smo nabrali punu jednu posudicu.

Potrebno je

5 jaja

180 gr šećera

150 gr brašna

8 kašika vode

4 kašike ulja

1/2 l mlijeka

3-4 kesice vanile

4 žumanca

150 gr šećera

3 kašike u vrh pune brašna ili gustina

125 gr putera ili 1 dl pavlake

2 šlaga

1.5 dl mlijeka

4 bjelanca

Odvojiti žumanca i bjelanca. Bjelanca umutiti u čvrst snijeg a žumanca umutit sa šećerom da pobijele pa im dodati vodu, ulje i brašno i dobro promutiti mikserom da se sve fino poveže. Zatim dodati bjelanca i kašikom promiješati. Peći u plehu na papiru za pečenje ili foliji na 200 C da fino porumeni. Pečeno tijesto izvaditi i ostaviti da se ohladi.

Žumanca umutiti sa šećerom da pobijele, dodati brašno, vanilu i malo mlijeka pa sve fino promutiti i skuvati sa ostatkom mlijeka. Ja obično kuvam u loncu za kuvanje na pari jer sam tako sigurna da mi fil neće zagoreti u toku kuvanja. Kuvani fil promiješati mikserom, pokriti providnom folijom da se ne uhvati korica odozgo i ostaviti da se ohladi.

Hladan fil promutiti mikserom pa mu dodati  umućen puter ili pavlaku i sve promutiti da se fino poveže.

Na hladno tijesto rasporediti voće. Mogu se koristiti jagode, maline, kupine, blanširane breskve ili kajsije. Preko voća sipati fil.

Dva šlaga umutiti sa 1-1.5 dl mlijeka pa kad budu čvrsti sipati bjelanca koja su preostala od fila i mutiti da se dobije čvrst šlag koji treba rasporediti preko fila. Kome smetaju živa bjelanca može staviti samo šlag odozgo a bjelanca iskoristiti za neki drugi kolač. Ostaviti u frižider da se rashladi.

Kolač je moj pokušaj da rekonstruišem kolač koji sam jela na nekoj ekskurziji (mislim onoj sa kraja srednje škole) koji sam probala u nekom restoranu prije Beograda. U tom kolaču je bilo nekoliko vrsta voća mislim da su čak bile i kruške i pošto mi je ostao u fino sjećanju kad sam se vratila kući smućkala sam nešto najpribližnije što sam mogla.

Od ostatka malina i kupina sam napravila sok.