Kolač sa malinama

Sezona malina je u punom jeku. Kako smo nedavno bili na par dana u Kolašinu odlučili smo da spojimo lijepo i korisno tj da svratimo par km dalje do Mojkovca tj do jednog sela u blizini Mojkovca i snabdijemo se malinama. Dok se kod nas na pijaci maline prodaju u malim kartonskim posudicama i izuzetno su skupe na selu se prodaju u gajbama i tri do četiri puta su jeftinije nego kod nas. Zato smo mi kupili deset kilograma pa će cijelu zimu biti i soka i kolača. Jedan dio tih malina sam odvojila da odmah napravim sok i čokoladni krem sa malinama i piškotama,dio smo i pojeli onako a nešto je upotrebljeno za ovaj kolač na slikama. Ovaj kolač je nastao u želji da napravim kopiju jednog kolača koji sam nekad davno probala u hotelu Avala u Budvi. Taj je kolač doduše odozgo imao preliv od voća i želea ali kako kod nas tada još nije bilo želatina i preliva za torta u prodavnicama taj sam dio odmah izostavila. Pravila sam ga sa jagodama, malinama i bananama i svaka od ovih kombinacija je odlična. Palo mi je na pamet da bi mozda i sa borovnicama bio dobar tako da će i ta varijanta biti isprobana ovih dana.

Kolač sa malinama

 

10  jaja
10 kašika šećera
10 kašika brašna
2 kašike ulja

4 bjelanca
200 gr šećera
3-4 kesice vanile
250 gr putera ili margarina
500 gr malina

1 kesica šlag pjene
maline

Umutiti bjelanca sa šećerom u čvrst snijeg pa dodati žumanca i još malo mutiti. Dodavati kašiku po kašiku brašna uz lagano miješanje kao kad se pravi običan patišpanj i na kraju dodati ulje. Masu podijeliti na dva dijela i ispeći dvije kore u plehu od rerne. Peći na 200 C da porumene.

Za fil umutiti bjelanca sa šećerom i vanilom pa ih skuvati na pari. U hladan fil dodati umućen puter ili margarin.

Šlag umutiti po uputstvu sa kesice.

Složiti koru, premazati sa nešto više od pola fila, po filu složiti maline ili neko drugo voće po želji, poklopiti drugom korom pa odozgo premazati ostatkom fila i ukrasiti šlagom i malinama. Ja sam koristila šlag iz boce što se na slikama vidi jer se on brže topi pa nije izdržao do kraja slikanja :-).