Slatko od trešanja

Slatko od trešanja pravim skoro svake godine. Obično dobijemo domaće trešnje od jednog ili drugog đeda a kako moji nisu baš raspoloženi za bilo kakvo voće uvijek ostane malo za slatko. Nekada smo u dvorištu imali bijele trešnje  koje nisu bile baš nešto za jelo i od njih se obavezno pravilo slatko. Te trešnje već odavno nema tako da sad slatko obično pravim od crvenih trešanja. Ono je svakako ukusno i dobro dođe kad nam padne šećer a u kući nema ništa drugo da se zasladimo.

Slatko od trešanja

1 kg trešanja

1,25 kg šećera

2 dl vode

1-2 kesice vanile

1 limun izrezan na kolutove

 Šećer naliti vodom pa kuvati dok se ne dobije veoma gust sirup pun balončića. Zatim u sirup dodati oprane i očišćene trešnje i limun narezan na kolutove. Kuvati još malo da trešnje budu skuvane a sirup dovoljno gust da kaplje a ne curi sa kašike. Skloniti šerpu sa ploče, pokriti je mokrom krpom i ostaviti do sjutra da se slatko ohladi.

 Sjutradan sipati u dobro oprane i u rerni posušene tegle. Čuvati na tamnom i hladnom mjestu sa ostalom zimnicom. Ja napravim obično pola mjere ili manje pa slatko čuvam u frižideru. Tako se može očuvati duže a i odlično je onako dobro rashlađeno. Možete ga koristiti i kao preliv za sladoled.